當人身陷逆境，往往會爆發出無比勇氣。今日少膽虫為咗衝出困境，憑住毅力同勇氣，推開淫賤黎房門。

「腦細，我要七萬！」淫賤黎邊把玩「腦冇西」邊抬頭，「七萬？七十萬都得啦！」順攤成咁，少膽虫忍唔住用港女聲調問︰「真係o架？」「啲《爛果》賣唔晒都係拎去燒，你想要幾多咪拎去囉！」原來空歡喜一場，「唔係呀腦細，我畀人勒索，想借七萬蚊江湖救急呀！」

淫賤黎一聽，即刻拍晒枱，「無啦啦做乜畀人勒索？」少膽虫已經抑制唔住情緒，口窒窒咁答︰「我……我尋晚打住邊爐同個靚女網友玩cam，食食吓見熱咪除衫囉，點知畀佢錄低晒，仲話唔畀錢就youtube見喎！」淫賤黎怒吼︰「你學人裸聊？都唔諗吓自己副尊容，點會咁筍有靚女搵你傾偈呀！」少膽虫六神無主，喊住同淫賤黎講︰「我以為符符碌碌有餐食，點知會搞成咁喎！」「你點止符碌？直情係負七，負七萬呀！錢就冇喇，最多擺你單嘢上《爛果》A1，賣得嘅咪畀張紅紙你囉！咪講咁多，除衫影幾張寫真做大相先！」淫賤黎笑淫淫咁行埋嚟，少膽虫徹底失控，「腦細唔好呀！打……打咩……嗚呀！」

第一手消息請下載on.cc東網iPhone/iPad/Android/Windows Phone Apps