真普選聯盟（真普聯）前晚舉行每周例會，討論元旦遊行具體安排同各黨工作分配。據了解，召集人鄭宇碩喺會上透露聯盟金庫只得番三十萬元，但仲有唔少街數未找，包括上月委託港大民意研究計劃所做嘅立法會選舉民調，花費約為八至十萬元。由於真普聯喺公布聯盟最終特首普選方案後要再做民調，所以除要抽取早前七一遊行嘅百分之十捐款外，嚟緊元旦要額外加多百分之五嘅捐款，以彌補真普聯來年使費。

設計圖片及對白

社民連人力唔就範

各政黨代表聽完鄭宇碩嘅建議後即時牙痛咁聲，話「抽水」抽足百分之十五實在太多，辛苦籌錢都只係得番個吉，反建議各黨只需上繳百分之五，不加反減。投訴完一大輪後，社民連同人民力量堅持唔肯「科水」，所以最終上繳金額仍要商討。估唔到班泛民加入真普聯時就係威係勢，講到錢就即刻閂水喉。

真普聯當晚亦有討論特首普選方案具體內容，雖然白鴿黨同公共專業聯盟肯喺方案中加入公民提名元素，但就唔肯加埋「缺一不可」四個字，相反社民連同人民力量就堅持一定要加埋，話咁先可以凸顯佢哋爭取公民提名嘅決心。雙方喺討論期間一度處於僵持狀態，社民連梁國雄更加即時「反枱」鬧大家嘥時間。最後大家決定喺下禮拜六召開特別會議，再次討論方案內容。

第一手消息請下載on.cc東網iPhone/iPad/Android/Windows Phone Apps