政壇：陳凱欣用仔女威脅高永文
食物及衞生局局長高永文一星期做足七日，就算大時大節都唔肯休息，搞到連佢轄下嘅員工都唔敢偷懶。育有一子一女嘅政助Rebecca陳凱欣就話，雖然自己暫時無意離開政府，但自爆成日會攞一對仔女嚟「威脅」高永文，叫高永文唔好畀太多嘢佢做，費事因太大壓力而萌生去意喎！
陳凱欣（右一）嘅囝囝（右二）叫佢唔好成日同高永文一齊。（資料圖片）
Rebecca四歲嘅囝囝成日都會問爸爸媽媽去咗邊，當囝囝知道媽咪又係同高永文一齊出席活動時，就會喺Rebecca返屋企時同佢撒嬌，叫媽咪唔好成日同高醫生一齊。有時為咗安撫成日投訴嘅囝囝，Rebecca就會話因為要留喺辦公室幫病咗嘅高醫生處理文件，等高唔好咁辛苦，可以早啲返屋企休息。不過，咁講就搞到囝囝早前竟然問高永文：「你係咪成日都病o架？」搞到高永文同Rebecca笑到唔知點答。
