香港大學校長徐立之前日出席一個中學講座，同六百幾位中、小學生分享基因研究經驗。提到喺港大工作十一年，佢除咗猛讚自己凝聚力高、成功集合多位學者嘅光芒變成「激光」之外，又趁機批評以前「某啲職員」缺乏合作精神，唔通知同事就率先向傳媒披露研究成果，仲搞到佢被記者問到口啞啞。唔知佢想畀說話邊個聽呢？

設計圖片及對白

集合學者光芒化激光

回顧十一年校長生涯，徐立之話改革、三三四學制、為大學籌款等都記憶猶新，至於做得好唔好就留畀大眾評論喎。佢回想十一年前踏入港大，雖然深感成班學者好叻，但係就唔多團結，因此佢努力令校園變成一個大家庭，可以包容唔同嘅意見，亦希望將學者嘅力量結合，將光芒變成激光，令研究做得更好。

徐立之舉咗個例子去批評啲「漏網之魚」，佢話有次被記者問到口啞啞，原因係有學者向報紙披露咗研究成果，但係事前並無知會佢，佢話此舉明顯缺乏合作精神，希望有關同事明白「分享」嘅重要性喎！講到底，其實徐校長都係暗批緊啲學者只顧自己攞威，同埋唔尊重佢啫。

至於對來任港大校長馬斐森嘅寄望，徐立之就一反最初「狂讚自己」嘅口脗，話自己唔會「指指點點」，又指港大需要「新陳代謝」，話自己嘅彈藥已經用盡，希望新任校長可以為學校注入新思維喎。問到一一年發生嘅「八一八事件」係咪佢校長生涯最大嘅污點，徐立之即刻收起笑容，猛話唔答。咦，徐校長啱啱先話「分享」最緊要，乜嘢意見都願意包容，點解突然又咁快收口呀？

第一手消息請下載on.cc東網iPhone/iPad/Android/Windows Phone Apps