廣告車橫行霸道 懶官僚當睇唔到

太一叮講緊乜？咪就係流動廣告車囉。近幾個月，呢類由貨車改裝嘅流動廣告車橫行霸道，為咗吸引途人目光，喺鬧市公然違泊，大搞流動舖、試衫會、銀行推銷，甚至連小型音樂會都一車俱全，你都咪話唔誇張。嗱，大家唔好諗住有樣學樣，以為可以申請「車」牌呀，太一叮話畀你知，呢啲流動廣告車係無牌o架！

周街泊車已經違例，仲係升級版無牌小販，咁就太過明目張膽喇。本來呢，廣告係生意嘅媒娘，以流動廣告車宣傳不失為一條兜客門路，弊就弊在呢種係未經許可嘅違規行為，商業機構有冇受益唔知，但普羅大眾肯定受害，阻街就係其中一樣。

係人都知，呢類流動廣告車基本上就係一間流動小店舖，貨品堆積如山，職員周街拉客，有啲仲霸道到將攤位擺出行人路添，如果個個都咁做，仲成世界嘅？試諗吓，馬路及行人路擠滿一間間朝行晚拆嘅攤檔，豈不是天下大亂？

唔講唔知，運輸署其實係設有廣告車輛許可證嘅，但只會向非商業活動發牌，如果有人乘機博大霧，將流動廣告車變成流動店舖，連租都慳番，對其他奉公守法嘅商戶好唔公平啫，吓話？你知啦，多得前特首曾蔭權爵士好帶挈，近年樓價飆升，租金瘋漲，如果當局對廣告車橫行霸道嘅亂象繼續熟視無睹，香港唔止有高官豪宅僭建嘅「地下王宮」，仲有一街都係嘅「流動商舖」添吖！

講起都好笑，流動廣告車嘅功能係宣傳，吸引眼球，偏偏港產官僚發雞盲睇唔到，一直放任不管。其實，港產官僚唔係眼大睇過龍，只係闊佬懶理，隻眼開隻眼閉啫。正如法律界人士話齋，當局對流動廣告車不監不管，顯示法律存在明顯漏洞，以前香港少有商業宣傳車，所以未被法例涵蓋，但係現時氾濫成災，有關部門須考慮設立監管制度，短期可靠警方抄牌打擊，長遠必須立法監管。立法會議員亦批評政府監管不力，令商業廣告車淪為三不管，打算喺立法會要求修例。

咁講啦，流動廣告車走緊嘅係法律罅，而呢條法律罅完全係港府造成，如果港產官僚唔想畀人掟雞蛋咯喎，咁就要快快做嘢補鑊喇，叮！