城中鏡：立會議員坐櫈唔知櫈貴
究竟一張櫈值幾多錢？民航處航空交通管制中心同警務處999報案中心早前傳出分別購入超過一百張名牌辦公室座椅，價值八千至一萬元。立法會議員陳志全（慢必）尋日提出口頭質詢，要求當局提供相關座椅嘅品牌、型號、數量及單位售價。當局回應指999報案中心購入二百四十張座椅，平均價格為四千三百元，而入境處十二個管制站共有六百張座椅，每張座椅不高於一千元。
慢必尋日質詢部門訂購座椅開支。（資料圖片）
睇番記錄，立法會中環舊大樓臨搬遷前都換過一次櫈，搬到金鐘新大樓後又換一次，每張櫈最少都要幾千元，即係話議員坐嗰張櫈一啲都唔平o架。
當局話999報案中心需要二十四小時運作，加上同一般辦公室規格有別，職員要同時間兼顧超過一台電腦，所以要購入相對穩固耐用嘅座椅，而部門採購亦會遵從物有所值、符合程序及指引。
話時話，999中心啲櫈幾乎二十四小時有人坐，立法會議員張櫈分分鐘一星期只係坐一、兩日，論使用率，議會可能仲輸一條街。
