城中鏡：徐子淇見暈澄清非有喜
千億新抱徐子淇早前出席活動時見暈，一度惹來第四度懷孕嘅揣測，尋日佢出席活動時就為事件釋疑，佢話識佢嘅朋友都知佢經常會暈，並唔係好大件事，仲話曾經就呢個情況睇醫生，醫生解釋話呢個現象係Panic attack，仲話自己暈三十秒之後就可以起番身，連老公李家誠都已經見慣不怪。徐子淇仲反問：「乜大肚會暈o架咩？我唔知點解會將呢兩樣嘢聯繫埋一齊。」
徐子淇話佢經常有頭暈現象，早前見暈同大肚無關。
徐子淇仲話，佢喺人多翳焗嘅地方就會出現呢個問題，試過一次出席個好大嘅儀式，有領導人在場，佢竟然喺台上出現不適，雖然撐住，但等到領導人一走佢就暈咗，要身邊嘅老公抱住佢入後台休息、飲水。為免出現呢個問題，徐子淇嘅手袋中備有糖同朱古力，依家佢嘅小朋友見到佢有暈眩嘅現象，都會立即攞自己啲糖畀媽咪食。雖然係咁，徐子淇都話其實冇乜大問題，只係有時會尷尬啲。
