每年一度嘅香港龍獅節快到喇，今年主題係大頭佛，元旦當日預料有一千個大頭佛、三百多隻獅子及數條巨龍一齊喺尖沙咀廣東道巡遊及舞動，可望創健力士世界紀錄。活動包括大會派出幾千個白色迷你大頭佛，畀名人及公眾參加上色比賽，環境局局長黃錦星、立法會議員林健鋒（Jeffrey）、陳恒鑌（Ben）、陳鑑林、旅遊界姚思榮早前已完成作品，佢哋各有創意，為傳統嘅大頭佛帶來咗新形象，幾得意o架！

陳恒鑌

陳恒鑌製作出勁punk嘅大頭佛。

林健鋒

林健鋒請槍叫同事為大頭佛上色。

黃錦星

黃錦星將大頭佛油到變成「大嘥鬼」。

姚思榮

姚思榮將大頭佛變成獅子頭。

林健鋒請槍

今次大頭佛上色比賽嘅作品，擺喺荃灣荃新天地藝廊展出，名人組方面，最有創意莫過於姚思榮嘅作品，因為佢竟然將個大頭佛油到變咗做獅頭，非常搶眼。黃錦星就將大頭佛油到變咗隻「大嘥鬼」個樣，真係無時無刻都宣傳「惜食」文化。阿Ben就整到個大頭佛勁punk，條眉唔單止係一剔，仲貼滿珠片。而畫功最靚嗰個就係Jeffrey，因為佢嘅大頭佛兩面泛紅，仲上埋光油立立令。不過議員工作咁忙，啲作品係咪出自佢哋手筆就好難講喇！

做玩具生意嘅Jeffrey坦言，佢只係負責大頭佛嘅設計，之後交畀同事上色，但自己都有親手去做後期加工o架，即係見到有唔夠靚嘅地方，執番好佢喎！阿Ben都話，佢只係為大頭佛設計概念，希望喺傳統嘅大頭佛上搞啲新意，但佢喺過程中都油咗兩筆嘅。至於同樣有份參加比賽嘅陳鑑林，為咗配合龍獅節及新年，於是為大頭佛戴上虎頭帽，意在為大家帶來歡樂咁話。

第一手消息請下載on.cc東網iPhone/iPad/Android/Windows Phone Apps