SUN搞作：少膽虫手記：你就有問題
自從淫賤黎畀人係咁丟……嘢後，成日都疑神疑鬼，雖然少膽虫已經氹掂咗李萌主，但淫賤黎仍對呢件事耿耿於懷，仲叫埋所有編輯開會，「《爛果》畀人鬧閉門造車，你哋點解釋？」少膽虫為求自保，即刻使出影帝嘅演技，喊晒口話︰「腦細，冤枉呀！我哋明明就做報紙，點會識整o架車出嚟呢？」
淫賤黎一聽，拍枱大叫︰「但人哋咁講，肯X定有問題！」會議室當堂鴉雀無聲，淫賤黎火氣未消，「做咩唔出聲？於心有愧呀？」少膽虫口都震埋，「腦細，對住自己人，唔使講粗口嘅……」語音剛落，少膽虫面上就多咗個掌印，「我淨係講咗句『肯肯定有問題』，邊度有粗口？」畀腦細咁講，少膽虫心中一急即「漏嘴」，「係嘅腦細，你肯肯定無講過。」突然，少膽虫面上又一陣炙熱，「少膽虫，無端端你又講咩『肯X定』，自己講粗口就唔好請我食『豬肉刺身』喇！」
少膽虫無奈，只好唯唯諾諾，但心入面就講咗句︰「你就肯X定有問題！」
