政壇：搞搞政：高永文全家做醫生
近日天氣轉冷，一個唔覺意就好容易中招。尋日立法會開大會，就見食物及衞生局局長高永文又戴口罩，又不時以紙巾抹鼻涕，一副病態，其實佢早幾日出席會議已經有啲先兆，依家證實佢真係中招，點解高醫生能醫不自醫？抱病上陣嘅高醫生話，其實佢一家四口全部都係醫生，可謂杏林之家，但佢一樣打敗仗，成家人亦都唔為意局長病病哋。高永文仲打算連聖誕節都堅持返工處理醫療保險等議題，名副其實係「工作狂」。
設計圖片及對白
老貓燒鬚打敗仗
一星期做足七日嘅高醫生，連續多日出席立法會會議時都戴住口罩，佢本身係骨科醫生，據佢之前透露，平時生活防疫意識好強，今次一病多日，真係老貓燒鬚。唔講唔知，高太係婦產科醫生，平日經常要「on call」返醫院做嘢，所以一啲都唔會介意老公冇時間陪佢。
除家中兩名醫生外，高家兩位公子原來亦向醫學界發展，佢哋不約而同喺讀完第一個學位後轉去讀醫科，依家大仔已經畢業做緊醫生，而細佬就仲喺大學讀緊醫科。加上高永文家姐本身係一位護士，睇嚟高家同醫護呢行都係脫離唔到關係。
