政壇：單雞當年點老馮買貴樓
候任政府新聞統籌專員馮煒光辭咗南區區議員一職，令港島海怡西選區出現空缺，佢嘅前黨友單仲偕（單雞）現正積極備戰。單雞透露，馮煒光○三年小試牛刀參選區議會時，就揀海怡呢個選區，當年佢仲建議馮煒光要贏就要先買海怡半島一個單位先得，馮煒光好聽話照辦如儀，點知最後選舉輸咗，沙士亦隨之來臨，樓市跌到谷底，令佢雙重損失。
單仲偕自爆當年建議馮煒光參選前先買樓，一度累馮煒光幾乎周轉不靈。（資料圖片）
馮煒光
馮煒光當時禍不單行，其公關公司亦遇上財困，差啲周轉不靈，好彩之後經濟轉好，當年買嘅單位現時已升至最少六百多萬元，而馮煒光間公司又接唔少大生意，最近佢本人甚至加入埋政府做官，認真世事難料。馮煒光就話，當年嘅事年代久遠，已經唔係太記得，但多年來都當單雞係兄弟，從來唔覺得有老點佢喎。我哋問番單雞，依家佢空降海怡參選，使唔使又買個單位呢？佢即刻耍手擰頭。
