政壇：路姆西甩底 假陽具赴會
「一擲成名」嘅宜家家居野狼公仔路姆西（Lufsig）尋晚正式改名叫「路福西」，路姆西從此成絕響，是福是禍仲未知。有學者就趁特首梁振英（CY）尋日落區，喺網上發起路姆西飛行大賽，實行「讓路姆西飛」，但飛就飛喇，不過係「放飛機」啫，最後影都唔見一隻。另一邊就有藝術工作者試圖偷運假陽具，頂替臨時缺席嘅路姆西，最終難逃保安阿姐法眼，假陽具當場被就地正法，無緣入場。
梁振英尋晚上載同路姆西嘅合照，隻公仔係送畀囡囡嘅聖誕禮物。（互聯網圖片）
保安阿姐（右）對住膠製假陽具怕怕醜醜，要求陳可樂（左）自行放入特備膠袋沒收。
港深城市/建築雙城雙年展（香港）尋日喺觀塘海濱嘅起動九龍東辦事處舉行開幕禮，場內外保安明顯升級，社運常客陳可樂陪同參展人入會場嗰陣，不但被保安攔截，入到會場範圍更被「挑選」為安檢目標，保安阿姐打開佢個袋一睇就發現膠製假陽具，當場嚇一跳，尷尷尬尬咁要求沒收毫無殺傷力嘅情趣玩具。稍後陳更同幾個藝術工作者喺會場內趁CY致詞時，高叫口號同舉起示威紙牌，迅速被早已包圍佢哋嘅便衣警員制服驅逐出場。
示威者招數愈出愈新奇，有人就騎電單車上觀塘繞道，懸掛兩條寫有「國際街坊警告：慎防文創推土機」嘅大型示威標語後速逃。路姆西失蹤於觀塘，原來去咗特首辦，CY尋晚忽然幽默，更新網誌，發表題為「與狼共桌」嘅合照，話欣賞港人創意無限，趁機買隻送畀囡囡做聖誕禮物，但CY有兩位千金，一隻似乎唔夠分囉！社民連副主席吳文遠就最醒，購入二十隻英國版路姆西，改咗名叫「限量西洋華麗路姆西」，實行「吊高嚟賣」，價高者得，收益會撥捐社民連打官司喎！
