政壇：王國興攞公廁廁紙做騷
東方報業集團早前踢爆本港公營機構公眾洗手間嘅廁紙樣本含菌量超標，立法會議員王國興（阿王）尋日就攞咗全港其中五個地區嘅公廁廁紙返立法會，要求食物及衞生局局長高永文攞去化驗，又話政府總部啲廁紙白雪雪，公廁嗰啲就係灰色，質疑政府待薄老百姓，不符平等機會原則。阿王涉嫌偷公廁廁紙做騷，如果咁啱有市民人有三急去公廁時發現冇廁紙點算呢？
王國興為做騷帶住多卷公廁嘅含菌廁紙入會議廳。
阿王尋日就帶咗五卷公廁廁紙入會議廳，佢話︰「人哋話同人唔同命，香港就同人都用唔同廁紙。」質疑係咪要去平等機會委員會投訴咁話。佢仲要求政府各部門嘅洗手間同公廁要用同一質素嘅廁紙喎。立法會主席曾鈺成都好關注啲廁紙嘅衞生，叫議員盡量唔好帶受污染物質入會議廳，又叫議員同啲廁紙保持距離。
高永文回應話廁紙顏色同含菌量冇關，佢亦唔建議攞啲開咗又有人掂過嘅廁紙去化驗，因點都可能會有菌嘅，強調當局有監督承辦商使用符合標準嘅廁紙。對於涉嫌偷廁紙嘅指控，阿王聲言只係喺公廁「借」廁紙，但就冇打算歸還。咁就唔係叫做「借」啦。
