政壇：葉劉十四字對聯論施政
政黨近排輪住同行政長官梁振英會面，就新一份《施政報告》提交建議，尋日輪到新民黨，主席葉劉淑儀、副主席田北辰提咗連串建議，佢哋仲帶埋一副對聯到場，以短短十四字概括佢哋嘅建議，唔知嘅人仲以為佢哋寫定過年嘅揮春添。
葉劉淑儀（右二）同田北辰（左二）展示對聯，概括佢哋對施政報告嘅意見。
葉太佢哋炮製咗份建議書，除建議加強人才培訓、扶助弱勢階層外，特別針對現時滿街都係內地來港購物嘅人士，提出設立專供內地旅客購物嘅商場。田北辰指出，新西嘅洪水橋站鄰近港深機場鐵路支線，假如上蓋興建一個大型購物中心，不但可以應付跨境旅客，亦為區內基層市民提供大量低技術就業機會，等天水圍、元朗區市民唔使跨區至九龍上班，佢哋建議喺當地興建一個十五萬平方米嘅巨型商場。據悉，梁振英亦對喺新市鎮設立大型購物中心感興趣。
除此之外，新民黨亦建議政府成立本地優才計劃，向獎學金基金注資十七億元，每年畀五十名本科生同二十五名研究生到外地頂尖大學進修優質課程。另外仲建議為低收入者再提供多啲交通補助。
