政壇：林鄭政改飯局冇交嗌
政改諮詢啱啱拉開序幕，民間火爆情緒已經升溫，帶領呢項工作嘅政務司司長林鄭月娥決定擺下「政壇飯局」，邀請立法會各黨各派議員摸住酒杯底軟性交流，飯局訂於明年初，喺山頂白加道官邸共擺四場，全體立會議員都有份。呢餐飯意義重大，但泛民、建制同枱食飯，勢必各自修行，據知，立法會秘書處都巧花心思，初擬一份林鄭飯局名單，務求減低飯局火藥味。
設計圖片及對白
秘書處精心安排
飯局設有四場，但為免議員逼埋晒同一日出席，立法會秘書處特意叫班議員填寫兩個得閒嘅日子，今日之前交回秘書處安排飯局時間。根據各場暫定飯局名單，就會發現議會內嘅激進同溫和派議員兜到亂晒，大原則係盡量避免火爆者對激進派。
初步所知，激進四子中嘅黃毓民表明無必要去應酬，決定杯葛晚宴，其他如人民力量陳偉業、陳志全同社民連梁國雄都決定揀去最後一場，即一月十四號舉行嘅晚宴。嘩！佢哋三個殺到，似乎最有機會出事喎，但據聞泛民出席者為民主黨何俊仁、黃碧雲、莫乃光、張國柱等人，加上建制派派出陳克勤、黃定光、何俊賢等人應戰，相信到時淨係得激進三子自己各自各「表演」，出事機會相對減低。
至於建制派中相對較火爆嘅蔣麗芸（Ann）同鍾樹根，就決定出席一月六號第二場晚宴，咁做就可以巧妙地避開激進三子，而且同場嘅泛民主派議員就只有涂謹申、陳家洛、張超雄等溫和派，相信兩人一定夠時間發表個人意見。呢一日新民主同盟范國威（Gary）都會出席，但建制又有行政會議員成員李慧琼，睇到呢份名單，做主人嘅林鄭估計開心晒。
