SUN搞作：打橫嚟講：零收視的重溫電視節目
只不過係十六個月啫，香港特區由一個尊崇誠信道德的國際化大都會，蛻變為充斥謊言偽語的大陸化小鎮。
香港那個周時零收視的電視台，一名高層接受電台訪問時，話自家製作的節目好到人哋都抄襲佢哋，個節目叫《歷史也瘋狂》，A貨係《瘋狂歷史補習社》；點知，唔夠兩分鐘，就有聽眾phone in踢爆，指只不過係抄英國BBC嘅《Horrible Histories》之嘛！戙L！
其後，此高層又回應通訊局批評佢哋欠缺有效企業管理時，佢說管治混亂分兩方面：股東及董事局的，和電視台日常運作的。佢說，電視台日常運作無問題，咁佢是否暗示上層董事有問題呢？佢即答：「上下一心！」哦！難怪有如此收視下場。
咁都未算！呢位高層自讚新製作的節目比例上升咗一倍添！仲話節目安排得很好，將每日「重播」幾次，說成係「重溫」。
「重播」同「重溫」係兩個九唔搭八嘅概念，身為一台高層，若非無恥死撐，就係無知無能。「重播」的意思，好簡單，「重複再播」也！「重溫」呢！則係「一個人睇完再翻睇」也！無睇過，就不是「重溫」。咁！「重播」係「電視台的行政決定」，而「重溫」係「觀眾的個人選擇」。
依家，一日重複不斷翻播啲舊嘢，令到觀眾無可選擇，這是有損觀眾權益的敗行，怎可能講成係日常運作安排得好咁大話連篇o架呢？
依家，香港特區內，好多庸廢高層日日謊話重複，活像跳掣錄音機，毫無人性，更不理受眾的痛苦和怒氣，只自說自話，自讚自誇，令人掟佢臭蛋！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
