城中鏡：朱亦兵琴藝精湛 名人激讚
享譽國際嘅中國著名大提琴家朱亦兵早前嚟香港演出，民政事務局副局長許曉暉（Florence）、大提琴名家張新玉、中國知名小提琴家李傳韻嘅父親李厚義等都去追星。張新玉話，演奏當晚佢未食飯就去欣賞殿堂級演出，朱大師果然技驚四座，震撼香江。Florence雖然唔識拉大提琴，但勁鍾意大提琴樂聲，八歲嘅大女Serene已經學咗一年幾，遲啲細女Sophie都會學，到時佢喺屋企就可以聽到大提琴演奏喎！
朱亦兵（右）與鋼琴家鄭慧（左）合奏饗知音，許曉暉（中）頓時變成小粉絲。
朱亦兵（拉大提琴者）及鄭慧（彈鋼琴者）台上演奏，技驚四座。
20歲國際賽揚名
朱亦兵係中國室內音樂難得一見嘅大師，佢八歲習琴，二十歲在日內瓦國際大提琴比賽中大放異彩，成為中國大提琴界喺重大國際比賽中獲獎嘅第一人，旅居海外二十一年，享譽世界。
佢十年前毅然回國，除咗間中跟隨國家領導人出訪或喺國事宴會上演出之外，多數時間係教授學生，提攜後輩。佢笑笑口話，雖然錢少但很開心，皆因佢熱愛音樂，仲笑稱自己其實係做速遞，只管傳送快樂嘅訊息。
