城中鏡：陳振彬着「中山裝」做博士
觀塘區議會主席陳振彬（Bunny）公職多多，仲係製衣界巨頭，呢位跨國企業老闆尋日獲香港公開大學頒發榮譽工商管理博士學位，呢個亦係Bunny第一個榮譽博士名銜。不過Bunny博士袍下亦遮唔住平日着開嘅冇領中山裝，陳太踢爆Bunny唔鍾意打呔又懶得襯衫，所以近年出席活動都係「仿中山裝」上陣。陳太笑言，屋企成個衣櫃都係呢款套裝，外套會根據四季天氣用唔同布料製造，咁就冬暖夏涼嘞。
陳太（右）踢爆Bunny（左）唔鍾意打呔又懶得襯衫，所以近年獨沽一味着「仿中山裝」。
新聞處處長黃偉綸同前民政事務局常秘李麗娟都嚟撐Bunny場，兩個人一度密斟，原來係李麗娟問黃偉綸幾時「脫苦海」，李麗娟話，「脫苦海」係政務官嘅「術語」，唔係話依家苦，而係調職咁解。聞說黃偉綸調任海事處處長，李麗娟就對佢好有信心，認為佢實做得掂嘅。
Bunny都講到生意成功之道，佢話當年遠赴泰國設廠，主動向員工分發公司三成利潤，實行有福同享，更創當地管理先河，難怪千幾個員工唔少已經跟咗Bunny十幾二十年啦。
