城中鏡：齊賀中大50歲 穿金配紫
中文大學今年迎來五十周年校慶，日前舉行校慶晚宴，城中名人校友紛紛出席，晚宴開足二百幾席，中大特別按環保組織所訂嘅指引選擇食材，又建議出席嘅嘉賓衣飾「綴以金紫色」，就係咁，晚宴場地到處可見高貴嘅紫色同金色。
中大嘅名人校友甚至校董們齊現身，左起葛珮帆、簡文樂、邱騰華及太太衣飾都襯到絕。
中大副校長霍泰輝（右）與極地探險家李樂詩皆着重環保意識。
九十一歲的楊振寧（左）精神奕奕咁攜太太翁帆出席。
晚宴嚴守環保
晚宴喺會展舉行，中大副校長霍泰輝話中大建校五十年，可喜可賀，然而要迎來下一個五十年甚至更為悠長嘅歲月，人類就唔可以竭澤而漁，胡亂浪費。所以今次安排校慶晚宴，就要盡量避免對生態環境帶來破壞，因此魚翅同髮菜不被列入晚宴菜單，就連席上嘅海產食材，都依照世界自然基金會香港分會制訂嘅《海鮮選擇指引》來挑選。不過，一餐飯對自然生態嘅影響始終有限，故此霍泰輝話日常嘅節能同減排都好重要，而中大正為此努力提倡綠色校園。
同中大甚有淵源、已九十一歲嘅諾貝爾物理獎得主楊振寧都同太太翁帆出席晚宴，中大校董兼立法會議員葛珮帆及簡文樂嘅衣裝就襯晒大會，簡文樂更加由頭紫到腳，再加一個金龍胸針；特首辦主任邱騰華就以一條紫呔配襯太太嘅晚裝。
出席校慶晚宴嘅極地探險家李樂詩博士好欣賞中大嘅環保意識，佢話得到賽馬會嘅資助，即將有一所氣候變化博物館於中大校園落成啟用，佢對呢所博物館已經期待咗二十六年，至於博物館嘅內容就要賣個關子，留待下周啟用禮再同大家講喎。
