政壇：政改討論變四字詞舌戰

政改諮詢戰打響後，政壇討論好似玩成語戰咁，先係基本法委員會主任李飛帶頭大講均衡參與、循序漸進，跟住又猛講四字詞，如機構提名、集體意志等，跟住特首梁振英、政務司司長林鄭月娥就跟上大講四字詞，尋日立法會政制事務委員會，議員亦好似感染咗呢股風氣咁，個個一開口就四個字咁嚟，如公文袋嘅郭家麒批評政改諮詢空間極細，同「畫地為牢」無乜分別。林鄭即時反擊話諮詢要有方向，唔可以「天馬行空」。

至於李飛早前講過「八九不離十」，白鴿黨嘅劉慧卿就話有街坊向佢反映唔知講乜，回敬一句「九唔搭八」。工黨李卓人就玩轉政府宣傳口號，明明係有商有量、實現普選，阿人話其實係「無商無量、實現篩選」。講到出口成文，又點少得教過書嘅黃毓民呢？尋日佢一口氣用三句成語「生安白造、捩橫折曲、斷章取義」批評政府。佢哋講得興起，市民聽辯論之餘，都可以學吓成語，算係意外收穫嘅。