政壇：馬雲氹網民 「派彩」3600萬
內地商界猛人馬雲創意無窮，佢創立嘅阿里巴巴淘寶網喺「雙十一光棍節」錄得超過三百五十億元（人民幣．下同）成交金額，威震中外，嚟緊嘅「雙12」（12月12日），佢哋又有新橋，今次更真金白銀攞出嚟氹網民呀。
買晒組合大小獎中齊
淘寶早前已經表明，「雙12」會拎出三千六百萬元回饋網民，好多網民都以為係「派紅包」（優惠券），尋日佢哋上載咗幅漫畫同網民講「你哋當中一定會出現一個土豪同埋一堆地主」，點解？官方微博話，淘寶會用三千六百萬元買晒十二月十二日雙色球彩票嘅所有組合，仲會將彩票分畀網民。由於組合畀淘寶買晒，所以當日出咩「冧巴」都好，無論係頭獎、二等獎、三等獎，抑或係安慰獎都好，統統都由拎到彩票嘅網民中晒，淘寶就預計頭獎將會由五百萬元去到一千五百萬元不等！
內地雙色球彩票嘅原理同香港六合彩差唔多，淘寶網今次將會用三千五百四十四萬元將一千七百七十二萬注組合全部買晒，至於詳情就會喺十一號下晝七點鐘公布！
