政壇：林煥光環保錦囊谷生育
政府早前發表人口政策諮詢文件，其中都有徵詢刺激生育嘅妙計，世界綠色組織尋晚舉行一周年慶祝酒會，行政會議召集人林煥光（WK）喺致詞時向在場人士推介環保錦囊，佢建議都市人每星期搵一晚熄晒屋企內所有電器產品，喺一片漆黑中食燭光晚餐，話咁做夠晒環保之餘，又可以營造浪漫氣氛，話唔定仲可以為香港帶嚟更多BB喎。
林煥光話，唔開燈食飯既環保又可以順手刺激生育。
曾鈺成加把口附和
除咗每星期搵一晚熄晒全屋啲電器外，WK仲建議大家一個月內搵個星期唔好揸車出街，既可以慳番啲入油錢，又可以乘機感受香港生活。最後佢就奉勸各位女士一年內搵一個月唔好購買除必需品外所有物品，咁做就可以令到成間屋都變得非常空曠，又可以減少浪費。
聽完WK所講嘅環保妙計，立法會主席曾鈺成就再講多兩句，佢話如果大家想連蠟燭錢都慳埋，可以趁天未黑就食定晚餐先，夜晚乜都唔使做，就夠晒環保喇。
