政壇：恒生高層變馬拉松之友
長跑好手近年好興四出征戰，參加唔同城市舉辦嘅馬拉松活動。前日係「恒生慈善跑」既深圳站活動，恒生中國新任行長林偉中都獻出上任行長後嘅第一次，率領內地成百個銀行員工跑馬拉松。同場仲有恒生中國副行長兼南區主管劉鑑坤、恒生傳訊及企業可持續發展總監張樹槐（Walter）等，呢幾名銀行高層精力十足，跑足全程，仲快過唔少年輕人咁話！
張樹槐四出征戰馬拉松賽事，自己銀行搞嘅更加唔放過。（資料圖片）
Walter話，呢場已經係佢兩星期入面第三場馬拉松，之前去咗跑廣州國際馬拉松，又完成埋ICC 100嘅垂直馬拉松。講到跑馬拉松，佢真係經驗豐富，呢一日佢就安排咗晨早四點鐘起身食早餐，佢解釋，要跑全程馬拉松，選手一定要提早三個鐘食嘢，咁樣先唔會喺劇烈運動時有影響，果然專家呀!
恒生中國代表完成賽事嘅同事，籌集總額逾十五萬元人民幣善款，將用嚟購買三千六百對運動鞋，送畀內地西部貧困兒童。既做善事，又鼓勵員工強身健體，真係好橋！
