政壇：港台猛抓錢耍陰招
香港電台「一闊三大」，先係申請耗資六十億元興建將軍澳新大樓，然後又申請近八千萬元分別延長負責新大樓等任務嘅副廣播處長五年，同埋興建二十二個數碼電視輔助發射站。立法會資訊科技及廣播事務委員會尋日討論呢兩項撥款申請，唔少議員都為港台開支大表示不滿，質疑港台最終唔知要幾多錢先埋單。有議員更質疑大樓開支都未傾掂，就另外攞錢搞其他建設，質疑此舉係「未過門，先洞房」，睇住港台發展嘅商務及經濟發展局局長蘇錦樑同廣播處長鄧忍光「擒擒青入新房」，似乎都係得個吉！
設計圖片及對白
議員憂外行領導內行
港台冇停手咁向立法會申撥嘅款項，議員鍾樹根尋日質疑，政府未有將後面兩項撥款申請放入新大樓開支，採取「沙煲罌罉另外再買」嘅策略，質疑當局有意「未過門，先洞房，米已成炊，造成既成事實」。講講吓，佢又拋個大閘蟹比喻，指政府企圖「先過咗爪、腳，到時嗰隻大閘蟹個身唔過都唔得」，新大樓造價或者增至一百億元。議員何秀蘭質疑，港台由外行領導內行，只會撞板。
建仔嘅蔣麗芸（Ann）則指，政府就新大樓六十億元撥款，已經有唔少提問答唔到，要求交代周詳報告或者明細表，之後更提出動議，要求工務小組同埋財委會通過新大樓撥款後，先至討論興建輔助發射站，委員會主席黃毓民兩度要求佢「講番呢個編外職位」，又窒阿Ann字眼唔得，要改改先符合議事規則，跟住又叫佢做「蔣委員」，阿Ann澄清自己係蔣議員，毓民窒佢係委員會委員，叫佢唔好烚吓烚吓。阿Ann反指毓民烚吓烚吓、噏得就噏，又還拖：「你唔好窒住我，你做主席做到咁，ok？shut up」（收口）。動議最終獲七票贊成、五票反對下通過。
