暴力示威掀歪風 始作俑者乞人憎

港府連日舉行施政報告地區諮詢會，場面七國咁亂，大批示威者包圍會場，又叫囂，又焚燒高官肖像，又掟嘢洩憤，火藥味濃烈。單講前日喺北角舉辦嗰場吖，先後三名示威者向台上發言嘅特首梁振英擲物，結果誤中副車，財政司司長曾俊華意外「中蛋」，頭部被一隻生雞蛋重重擊中，即時蛋花四濺，痛苦慘叫，雖然事後無恙，但狀甚狼狽，成為暴力示威之下嘅「頭等」受害者。

嗱嗱嗱，咪以為激進示威會收斂吖。最後一場施政報告諮詢會尋日喺大角咀舉行，結果又變武鬥大會，有人拋紙球，有人撒溪錢，有人大叫搗亂，視秩序如無物。當高官乘座駕離開，場面更加失控，示威者唔止掟水彈，仲一度想衝出馬路，有人遭警員抬走，亦有人喺混亂中跌倒，簡直險象環生，沒有最激，只有更激；沒有最亂，只有更亂。

君子動口不動手。示威還示威，點解要訴諸暴力呢？點解唔可以和平進行呢？香港言論自由，示威請願無錯係市民嘅基本權利，但唔好忘記，香港亦係法治社會，崇尚和平，如果有人以激進代替理性，以粗暴抗爭代替和平表達，咁就等如帶頭破壞香港人珍而重之嘅言論自由環境，一手摧毀香港人包容理性嘅核心價值，主流民意係絕對唔會接受嘅。

再講，官民之間嘅關係係互動，示威行動愈激進愈暴力，警方防衞就愈森嚴愈強硬，死結只會愈纏愈緊嘅咋。講句唔好聽，暴力示威成風，不同政見者之間郁啲就你向我掟雞蛋，我向你射水彈，香港容乜易變成另一個泰國o架？到時「示威之都」變「動亂之都」都似！

歸根究柢，激發呢股政壇掟嘢歪風嘅始作俑者，就係前特首曾蔭權爵士。喺佢禍港嘅七年，樓價飆升，貧富懸殊，社會不公，天怒人怨，激進路線咪有市場囉。講起上嚟，貪曾首次被人掟蕉，咪就因為佢虐老、欺老，搞到有人忍唔住發洩囉，有人做初一，有人就做十五，暴力示威話咁易就蔚然成風。

掟嘢歪風惡化，今屆政府點化解呢？冇嘅，撥亂反正囉，為住屋、長者、教育等問題對症下藥，若然人人安居樂業，暴力政治自然就冇市場啦，係咪？