真係豈有此理！好很恐怖，高官落區諮詢，竟被人眾目睽睽下掟蛋，顏面何存？即場兩度譴責是不足夠的，「依法」（即「正路」）追究也無法平息心中怒火的！

看到現今香港廢柴政府內庸才當道，無人識做嘢，要出巡往往孤獨面對「恐怖突擊」，本人深感同情之餘，還想盡點公民責任獻策，禁絕將來類似暴行：首先，派重案組調查掟蛋者返工地點，繼而就會有愛字堆集團兄弟喺嗰度拉banner播DV，跟住要佢哋老闆交報告，並且起清埋老闆全家九族親友嘅背景，令佢哋帶眼識人。一於文攻武嚇，睇吓仲有邊個敢再請搞事嘅人？

其次，便是內部追究責任。何解，案發現場，話有三排貌似精銳分子的「食蕉」，竟連一隻雞蛋也擋不住，好彩掟中有深厚功夫底子的鬍鬚曾啫！

呢棚「食蕉」點做嘢o架？或是特登放水，有內宄（音「鬼」）？一定要查明真相！否則，下次點「保護」南下的主子？

講到真相，當會後有記者要求鬍鬚曾講遇襲感受時，以「現階段不建議司長講話」而禁他發言是醒目的！因怕鬍鬚曾繼喺場內攞彩後，唔知仲有乜後着。其實，曾司長話無着靚西裝嚟，因係「有少少預知」會有咁嘅事。

喂！即係落區做秀必惹民憤的後果？定係佢一早知有人掟蛋？所以，我建議食衞局高永文強制性捉鬍鬚曾入院隔離檢驗，唔係睇掟中佢嘅雞蛋有無禽流感傳染咗畀佢，而係check吓佢有無畀隻蛋掟壞腦呀？

吖！漏了！應發放掟蛋者的黑材料，佢哋肯定有包二奶、私生女、僭建，甚或醉駕、囤地……千祈不能放過他們！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps