SUN搞作：SUN官場現形記：不知悔改
使咗七億嘅消防第三代調派系統頻頻跪低，正所謂救人如救火，點可以咁草率？李衞即時搵錯鑫討說法……
李衞：錯鑫！調派系統又跪低，你仲咁得閒煲煙，唔去幫手派車？
錯鑫：調派系統跪低係已知風險，淨係今年都七次啦，好小事啫。
李衞：影響白車調動都話小事？有啲病人等咗成個鐘先有白車，小病都變大病！
錯鑫：咁咪仲好，呢啲就係曲線教育，等市民知道小病唔好濫用白車。
李衞：（怒）咁大病call白車又點？唔通又係濫用？
錯鑫：呢個都係曲線教育，只要大家病向淺中醫，就唔會有大病啦！
李衞：呵呵，咁陣間我使唔使幫你call白車？（一班憤怒病人衝出，打到錯鑫嘔電）
錯鑫：白……白……白車！
