城中鏡：莊家彬戴耳環一於要左
踏入聖誕月，城中派對接連開鑼，唔少人都會趁聖誕派對勁玩一番。日前一眾青年才俊聚首，佢哋大玩閃爍概念，連男士都冇得走雞。
莊家彬（左）遵從「左型右基」嘅原則，閃石黐在左耳。
要「型」拒「基」
各位男士除咗要戴耳釘外，仲要閃閃令添，有啲嘉賓都為大會嘅要求造型感到頭疼，尤其係戴耳環，事關男士戴耳環，會唔會惹嚟同志疑雲o架？
其實佢哋並唔係戴真嘅耳環，只係貼咗粒耳釘狀嘅彩石喺耳垂上面啫，但唔少男士都似有啲不安，有份幫兄弟們裝身嘅莊家彬見狀即刻解畫，莊家彬話：「放心啦！我問過嘞，『左型右基』，即係話貼左耳係有型，貼右耳先至係基啫。」
一眾男士聽罷，臉上陰霾漸消，齊齊喺左耳黐上閃石，莊家彬更幫兄弟噴彩色髮膠添，一於開心裝身、玩轉派對。
