城中鏡：上影影：九巴兩小公主學嘢多元化
唔知係咪不要輸在起跑線嘅概念近年成為潮流，好多家長都感覺兒童學習壓力愈來愈重，九巴新抱雷林靜怡日前與兩名女兒一齊出席活動，問到佢嘅千金依家學啲乜？佢一輪嘴數道：「多呀，學成十樣嘢，有普通話、英文、中文、溜冰、繪畫同埋芭蕾舞等等。」
雷太兩名千金自小已百足咁多爪，現在課外學習多達十個項目。
取消曼谷行
兩名千金分別係九歲嘅二女Jacqueline及六歲嘅細女Jamie，佢哋日前同媽咪一同參加聖誕芭蕾舞聚餐，佢哋要學咁多嘢，會唔會辛苦呢？雷太話，佢哋自兩歲已經開始學，唔識講話辛苦。至於十三歲嘅囝囝要主力讀書，課外學習相對少啲。
聖誕將至，雷太一家原本計劃月底一家人到曼谷旅行，順道慶祝囝囝和囡囡的生日，點知泰國政治局勢動盪，佢哋都取消咗計劃，今年聖誕睇怕要留喺香港過囉！
