城中鏡：晶晶亮晶晶
「跳水公主」郭晶晶嫁入豪門後，好快為老公霍啟剛添丁，但倍受寵愛嘅晶晶一直低調，一切以老公為先。日前出席由香港青年聯會、菁英會及華菁會齊合辦嘅聖誕Party，晶晶靜雞雞戴上定情信物，頸上閃爍嘅紅寶加鑽石頸鏈及耳垂上嘅耳環，原來係啟剛送嘅結婚禮物，認真大手筆！
郭晶晶戴上紅寶石結婚禮物，笑得甜如蜜糖。
青聯賢慧社召集人周沁（右起）、郭晶晶、青聯賢慧社前主席羅詠詩、大會司儀陳穎妮齊齊合照。
啟剛、晶晶同囝囝，一家三口為兒子慶祝出生一百日。（霍啟剛提供）
話晒係國寶級健兒，晶晶產後三個月已收晒肚腩，着上黑色貼身裙，纖腰亦再現。呢晚晶晶無抱BB出嚟，樂做老公背後的女人，啟剛以青聯主席身份上台主持遊戲環節，晶晶就喺台下含情脈脈打氣，乖巧到極。難怪婚後嘅啟剛開朗又鬼馬，笑言剛滿百日嘅兒子樣子老積，似足「阿伯」，近日正在學習翻身，樣子趣怪。啟剛又話兒子雙腿天生神力，遺傳媽咪嘅運動細胞。
新春出動囝囝逗利是
雖然出身大富之家，啟剛為悉心栽培兒子，都一早儲定教育基金，買乜就保持神秘，但佢話總之一定唔會學媽咪朱玲玲咁只買金。啟剛話:「啲金二十幾年來無乜點升過，早知叫媽咪買股票好過。」其實黃金喺過去三十年都升咗逾倍，可能啟剛想得到更進取嘅回報啦。啟剛又笑言，嚟緊農曆新年，小啟剛會幫手出動逗利是，幫補吓爸爸嘅支出，等佢唔使派得咁肉赤喎！
