東方報業集團前年踢爆民主黨（白鴿黨）喺太子恒利商業大廈四樓總部業權不清，外界一直淨係知道總部物業由Sound Factor Limited呢間公司持有，但就唔知原來該黨嘅立法會議員何俊仁同前議員李永達持有公司股份，仲從未向立會申報利益，亦唔肯詳細交代租金去向。白鴿黨尋日召開周年會員大會，宣布「欣然接受」Sound Factor Limited全部業權，代表黨已經直接擁有總部物業，但就無交代其他疑團。白鴿黨高層發功，將業權變、變、變，唔通以為將疑團掃入地氈底就會消失？

設計圖片及對白

商人于品海早年以Sound Factor Limited名義協助白鴿黨購入現時會址，並以低於市值嘅租金租畀白鴿黨作總部之用，而白鴿黨每月都有交租，近六年月租為兩萬蚊。白鴿黨主席劉慧卿尋日喺周年會員大會上宣布Sound Factor股東們決定將所有股份轉送畀民主黨，並向公司註冊處提出申請，終於九月獲公司註冊處回覆，原則上同意白鴿黨持有Sound Factor。換言之Sound Factor得白鴿黨一個股東，兩位董事分別為該黨秘書長及司庫，並會隨領導層換屆而換人。

秘書長張賢登話該黨向公司註冊處申請時並無搵測量師為物業估值，但睇番附近同樣二千多呎嘅單位市價，估計恒利物業現值一千五百萬元。佢又話多年來向Sound Factor交嘅租金已經攞晒嚟交管理費同其他雜費，所以無乜錢剩。根據土地註冊處資料，恒利總部一早喺九九年供滿，但好多嘢都仲係迷團，譬如多年來交租嘅錢有無畀人中飽私囊？商人于品海喺轉手前嘅持股量有幾多？何俊仁憑乜嘢話自己無收過股息或袍金？唔係話轉換咗股權，一切疑團就消失晒o架嘛！

第一手消息請下載on.cc東網iPhone/iPad/Android Apps