政壇：禽流感襲港名人雞照食
H7N9個案持續出現，深圳活家禽響起警號，香港應否「禁雞」成為全城熱話。但講起食雞，城中一班名人都冇有怕。愛沙尼亞駐港名譽領事林建康太太黃寧艷最重視家人健康，佢尋日現身馬場，傾起食雞，佢話買雞時只揀香港農場培育、生產，有晒衞生檢疫嘅健康雞，打激素谷肥嘅大雞一定唔買。恒隆集團董事總經理陳南祿都話未驚過，拍晒心口話照吃雞。
太太黃寧艷（左）為家人嚴選無打激素的健康雞，咁細心，老公林建康（右）當然放心食。
雖然疫情喺內地升溫，但林太話，現階段無諗過停食雞，只叮囑傭人煮雞時煮熟啲。另一名精明主婦、太子珠寶鐘錶執董鄧宣宏雁亦話，依家佢仍然照樣食雞，但會提醒傭人去街市買雞時，要揀有信譽的舖頭，又寧願貴一點，柯打喺優質農場飼養嘅雞隻。經歷全港殺雞一役，香港人自有一套「禁雞指標」，覺得唔多妥時，自然封口唔食。
