政壇：周浩鼎大婚象哥贈兩句
立法會進出口界議員黃定光（象哥）已經冧莊三屆，佢計劃下屆退下火線，盛傳接棒嘅係佢徒弟、香港青年時事評論員協會主席周浩鼎（Holden），象哥趁徒弟結婚嘅大日子，露口風溫馨提示周太，指Holden一旦進入立法會，就要「日以繼夜，夜以繼日」工作，呼籲周太唔好咁早鎖門。
黃定光（右一）喺婚禮上訓話，叫新任周太（左一）為周浩鼎（中）執正啲。
Holden同任職美國有線電視新聞網（CNN）嘅未婚妻Alice前日拉埋天窗，作為師父嘅象哥當然係座上客仲有份致詞，首次透露二人師徒情誼源於競爭法，又向周太提三點希望，要有湯水同幫Holden執正啲，包括頭髮衣着企理啲，令在場嘉賓拍爛手掌。
除師徒緣分，Holden大婚之日都有其他感動位，例如周媽媽為愛兒清唱一曲以示祝福，Holden弟弟以一句「我愛你」表達兄弟情誼，搞到Holden眼濕濕收場。
