政壇：阿毛打橫嚟講基本法
政府已就政改展開諮詢，尋日有個政改論壇舉行，近排因搞本土行動成為焦點人物嘅公民黨立法會議員毛孟靜（阿毛）又再大放厥詞，佢話成份諮詢文件冇提過「公民提名」，係鳥籠政治、假諮詢，又話公民提名係普世價值同人權，政府憑乜嘢話唔符合《基本法》第四十五條嘅「民主程序」，仲話《基本法》冇提過市民可以食飯同呼吸，但市民照樣做上述兩件事，普通法下法律冇講嘅嘢就可以做。意思係公民提名同呼吸、食飯應該係同等嘅。
阿毛呢個說法真係打橫嚟講，唔知其他人會佩服佢嘅理論水平？定係對立法會議員有咁嘅水平悲哀？要知道《基本法》係香港嘅小憲法，所述者係大框架，佢將呼吸同食飯攞嚟類比，擺明係冇辯論或討論嘅誠意，照佢嘅說法，可能更多市民應該質疑，《基本法》都冇寫明立法會議員可以遲到早退、甚至去洗手間，點解啲尊貴嘅議員做齊晒？甚至《基本法》冇話佢可以生存到今日啦……
掉轉嚟講，《基本法》要求香港立法機關制訂嘅法律不得與《基本法》有牴觸，啲議員又係咪當睇唔到呢？打橫嚟邊個唔識？一句講晒，啲議員耗用港人咁多公帑，唔該衡工量值喇！
