政壇：貪湯遺「漬」成廉署景點
廉政公署一直都被視為本港打擊貪污嘅橋頭堡，但前廉政專員湯顯明（貪湯）上年被揭發同佢老細「貪曾」前特首曾蔭權爵士一樣，涉利用職權貪威識食後，畀政府、廉署同立法會政府帳目委員會「三路追殺」。佢衰就算喇，仲搞到廉署個名同形象大受影響。廉署明年踏入四十周年，二月會舉行開放日，除咗展覽廳、錄影會面室，相信到時市民都好想知道貪湯買嗰啲茅台擺咗喺邊，甚至佢批准買返嚟嘅「全署禮物」魚蛋牛腩，如果有份食嘅話，又會喺邊度齊齊享用。
設計圖片
明年二月搞開放日
明年二月十五日（星期六）早上九時至晚上七時半、十六日（星期日）同二十三日（星期六）早上九時至晚上六時半，廉署會舉行開放日，開放部分設施畀公眾人士參觀，包括更新後嘅廉署展覽廳、模擬錄影會面室、列隊認人室、廉署人員使用嘅槍械設備等。參觀行程約個半鐘，由廉署人員隨團講解。廉署會派發約五千三百張開放日入場券，市民今日可以透過廉署網站申請，亦可以填妥申請表格後寄返廉署，截止申請日期係今個月二十四日。
早前立法會帳委會公布嘅文件，再次揭發貪湯貪威識食嘅一面，更顯示廉署曾經購入唔少茅台，而港人至愛嘅小食魚蛋，更係廉署款客嘅其中一項食品。貪湯雖然面對追殺，但廉署點樣處理佢嘅蘇州屎都係唔少市民關注嘅焦點，睇怕廉署人員有必要做好準備，應付市民參觀時嘅疑問。
睇番資料，廉署對上一次搞開放日係二○一○年，相隔四年再搞，相信貪湯喺廉署留下唔少「痕迹」，好似有傳佢喺辦公室煲中藥，唔知可唔可以參觀吓，睇吓仲有冇陣味；貪湯收埋唔少禮物，或者署方可以考慮吓加埋入個行程，展示吓啲禮物，等市民知道佢有幾奢華，以作警惕都好。
