消防腦殘頻出醜 調派系統又跪低

嗱，好嘅唔靈醜嘅靈，消防處嘅第三代調派系統又跪低喇。尋日早上繁忙時間，呢個耗資七億公帑引入嘅系統突然「腦梗塞」，唔能夠如常自行揀選救護車「接Call」，搞到控制中心倒瀉籮蟹，要全部改用手機同無線電派車，仲要額外抽調人手去控制中心頂檔。

繁忙時間整劑咁嘅嘢，而且仲跪低接近三粒鐘，唔使問，服務梗係亂晒大龍喇。呢，有病人家屬投訴，尋日早上打九九九召喚救護車送病人去醫院，點知足足等咗成粒鐘，救護車先至嚟到，而且仲係跨區嘅救護車添。好彩病人當時情況唔算好嚴重咋，大吉利是講句，萬一有乜冬瓜豆腐，消防處又點孭鑊先？

正常情況下，第三代調派系統接到求助訊息之後，會自動揀選並顯示最近召喚地點嘅部門車輛前往救援。點知系統跪低之後，當值人員都唔知Call邊架車，惟有亂點鴛鴦，甚至跨區派車，搞到七國咁亂。消防處嘅服務承諾係，九成半救護車召喚可於十二分鐘內到場，點知今次所需時間居然係服務承諾嘅五倍，問你服未！

話時話吖，消防處管理混亂，烏龍百出，今次已經唔係第一次出醜喇。就今年五月之嘛，消防處嘅通訊指揮系統四日內三度死機，先係數碼化無線電通訊系統連續兩日跪低，跟住輪到第三代調派系統癱瘓，控制人員要用電話調派前線消防及救護車輛；到九月份，呢個廢柴第三代調派系統又衰多鑊，亂點鴛鴦譜，竟然先後四次指示白車前往錯誤地點，導致病人差啲因為延誤救治而冇命。受害者痛斥消防官僚搵人命較飛，真係一啲都冇講錯。

講起消防處嘅醜聞，直頭三日三夜都講唔晒，除咗調派系統頻頻故障、消防員裝備五勞七傷、豪花公帑採購嘅消防車變射水無力嘅「垃圾車」、火燭車唔係隨時跪低就係通街撞車等等，總之一句講晒，沒有最醜，只有更醜。堂堂紀律部隊淪落到咁嘅地步，都唔知好笑定好嬲。

消防處指揮系統「腦梗塞」，歸根究柢係因為有班壞腦兼無能嘅廢柴消防官僚，佢哋不務正業，該做唔做，唔該做嘅就亂嚟，滋擾傳媒打壓新聞自由鬼咁積極，救人救火就搞到一鑊泡。上行下效，有樣學樣，管理層不務正業，消防處唔烏煙瘴氣、七國咁亂至奇喇，叮！