SUN搞作：少膽虫手記：請食雞
「好喇，好喇！大家唔好做嘢住，出嚟歎好嘢先！」《爛果》員工個個嚇得瞠目結舌，因為估唔到呢句說話係出自淫賤黎口中。
「做咩個個眼定定，少膽虫過嚟！」跟官咁耐，大家點會唔知官孤寒，但少膽虫點都要死頂上前，「腦細，有咩好嘢呀？」淫賤黎一臉淫笑，搓搓雙手，「聖誕節，梗係雞喇，新鮮叫，好嫩口，包大家翻尋味！」
聽到淫賤黎將雞形容得繪影繪聲，個個男士都蠢蠢欲動，就在少膽虫左思右想之際，一位員工已經「舉旗」投降，其他人見到即個個變身「厹公」，狗衝上前……大快朵頤。
不過少膽虫又點會睇唔透，所以堅持唔食，心諗︰「啱啱先話有H7N9，腦細仲唔係趁低吸納咩？內地雞扮火雞，聖誕慶祝就咁慳一筆！」就在眾人食得興起之際，淫賤黎突然問︰「點呀，啲雞好唔好味？」一位員工大叫︰「唔使加雞汁都好味喇，隻火雞咁肥！」
淫賤黎忽然手指門口，「咁就好喇，食過『肥雞餐』，執埋包袱安心好上路。」搞到啲同事嘔番晒啲雞出來，少膽虫呢一刻只有一個想法︰「《爛果》虧到趴街，有肥雞餐你食咪算偷笑……」
