潮語「投共」嘅意思，非常直接就係向「中共投誠」又或者係「投奔中共」。以前國共內戰，時有共黨人投向國府，當時國民黨人多對外宣稱那人是棄暗投明，投奔自由。相反，如有國民黨或親台人士變節，投向中共懷抱，多數被稱為「投共」。

最近研讀香港本土歷史，讀到三年零八個月日軍侵略香港嗰一段，當中提到日軍只用咗四日就由深圳打到九龍，佔領香港大片地方，將英軍逼到香港島固守。當日軍打到九龍嘅時候，當時嘅香港人，包括社團分子，並無組織啲咩游擊隊志願軍反抗，而係有部分港人竟然爭相投向日本侵略者嘅懷抱，企圖賣港搵着數。雖然呢啲事已經過咗七十年，但係依家睇番，嗰啲所謂漢奸其實都非常有現代港人嘅味道，就係識時務，邊度有錢搵就去邊度！唔理係英國人、日本人、印度人、美國人……總之邊個有錢有飯食，就認佢做大佬。叫聲老闆，有咩問題？你鍾意叫你老竇叫佢阿爺都仲得！最緊要有飯食，邊個做老細有咩所謂？難怪香港回歸十六年，無數人都畀人話過「投共」，令「投共」呢個始於上世紀嘅詞語又潮起嚟。

但到咗今日嘅香港，當然政治色彩冇當年咁濃，今日潮語話人「投共」，即係話某人同中資機構合作，或同大陸做生意。如果話某政界中人「投共」，就即係佢變成親中人士。「投共」了嘅人當然唔會再批評中共，仲不斷感恩戴德，感謝中共為復興中華民族所作嘅貢獻。「投共」有啲人覺得係貶義，但更多人對「投共」不以為然。如果命運能選擇，只要對得住天地良心嘅話，自然可以瀟灑。但係良心喺今日嘅中國，又值幾錢一斤？好似公民黨核心成員湯家驊，最近對政改嘅言論同建制派如出一轍，佢又係咪「投共」呢？

第一手消息請下載on.cc東網iPhone/iPad/Android/Windows Phone Apps