林慧思透露心情平復咗好多。
小學教師林慧思早前爆粗辱警引起軒然大波，事隔近五個月，佢尋日接受電台訪問，透露心情平復咗好多，但原來仲請緊假未復課，已經三個幾月冇開工。佢仲自稱有焦慮、抑鬱甚至創傷後遺症，家庭醫生擔心佢情況惡化，決定轉介佢去睇精神科醫生。
到底幾時至可以復課呢？佢自覺準備就緒重返崗位，但醫生認為佢未係時候，校方亦勸佢休息夠先再決定喎。至於佢自稱事發當日由上水「行經」旺角買餸，一直被指係煙幕兼自設嘅「局」，佢解釋，自細喺旺角長大，所以特別鍾情去旺角買餸，事發當日正正行緊去街市買餸，只係因為掛住鬧警察，搞到餸都冇時間買。
嗰次事件引發嘅千人集會查實源於中港矛盾，作為本土派中堅分子嘅林慧思，就建議與其任由內地人湧入香港搞「中港融合」，不如呼籲港人搬返內地，同內地融合仲好喎。點解林慧思唔考慮率先北上定居、同內地融合吓呢？話唔定可以化解中港矛盾呢。
第一手消息請下載on.cc東網
