政壇：蔡加讚出錢出力助青少

蔡加讚尋日以冠名贊助商身份，現身香港廣西總會嘅慈善田徑賽，佢話公司捐出總共二十萬，佢仲落場參加三千米長跑競賽，出錢出力嘅佢話款項係作為獎學金或經費用途，幫助有需要嘅青少年。佢坦言早前忙於婚禮，冇練跑，而近年又少做運動，只係間中打籃球同游水。咁太太汪圓圓會唔會現身做啦啦隊打氣？佢笑得好甜咁話：「圓圓叫我諗住終點有佢喺度！」之後佢解釋圓圓未能撐場嘅原因：「之前好多親戚朋友都喺外地飛返嚟出席我哋嘅婚禮，依家陸續走，佢要送機。」