政壇：揀靚女嘗普選 譚志源搞爛Gag
二○一七特首同二○二○立法會選舉嘅政改諮詢開波，由政務司司長林鄭月娥、律政司司長袁國強同政制及內地事務局局長Raymond譚志源組成嘅三人專責小組，近日兵分三路忙於解畫，仲要同泛民主派甚至佔中行動嘅發起人戴耀廷等人舌戰。但原來喺諮詢未啟動之前，Raymond已經主動出擊。
設計圖片及對白
話說香港珠寶製造業廠商會早前舉辦二十五周年晚宴，當晚有一個環節，就係畀現場賓客可以同評審齊齊票選出新一屆珠寶小姐。做主禮嘉賓嘅Raymond趁機搞爛Gag硬銷政改，話雖然未到二○一七年一人一票選特首，但當晚大家已可行使投票權，嘗到普選嘅滋味喎！
政治環境紛擾難樂觀
聽到Raymond咁講，睇怕在場嘅賓客都飄飄然。之不過，喺依家紛紛擾擾嘅政治環境下，究竟政府係咪可以說服到泛民主派接受提名機制、參選人入閘數目等呢？市民到底係咪可以喺二○一七年一人一票選特首呢？仲係言之尚早，睇怕Raymond都唔敢樂觀。
講番個晚宴，當晚珠寶界人士雲集，包括中華廠商聯合會副會長吳宏斌同囝囝吳景瀚，仲有古珀行珠寶總裁沈運龍同太太。當晚評審有前港姐鄺美雲、前亞姐陳煒、時裝設計師何國鉦同立會議員林大輝等。大輝一入場就胸有成竹咁話，當晚候選佳麗個個都咁靚，好多人話唔知揀邊個，但佢做過香港小姐評判，一早睇好二號，結果二號真係大熱勝出，抵佢咁風騷。
