慈善組織欠監管 港府莫做無牙虎
香港人愛心爆棚，所以慈善組織特別多，可惜樹大有枯枝，族大有乞兒，近年不斷有人掛羊頭賣狗肉，以慈善為名大肆斂財，搞到慈善活動五花八門，亂象叢生。法改會計劃修例堵塞監管漏洞，經過長達六年嘅研究，尋日終於拋出一份報告書，究竟點樣監管呢？
嗱，法改會嘅建議係咁嘅，日後所有慈善組織必須註冊，要先攞牌至可以向公眾募捐同尋求豁免繳稅，仲要提交財務報告，但暫時就唔建議成立慈善事務委員會或者制訂慈善法。法改會話，採取非法定實務守則，而唔係施加一套強制性規管，對維持慈善組織紀律有正面作用喎。
講就好聽嘞，問題係，法改會並無建議由邊個政府部門負責監管慈善組織，咁嘅註冊制度同無牙老虎有乜分別呢？正如有立法會議員質疑，以實務守則規管專業籌款者，根本無法杜絕亂象。
話時話吖，法改會早喺○七年已經話要修例規管慈善組織，弊在講完就好似冇咗件事咁，一拖就係六年。雖然話遲到好過冇到啫，弊在新例得嗰半桶水，缺乏阻嚇作用，結果咪又係嘥氣。
唔講唔知，現時全港所謂嘅慈善組織多達七千五百個，每年籌募金額高達九十億元，絕對唔少o架。可惜港府唔監唔管，放任自流，一直冇制訂正式嘅慈善組織註冊制度，亦冇特定政府機構負責監管，有人渾水摸魚又有乜出奇吖。
由於法例寬鬆，慈善組織基本上處於無王管狀態，阿貓阿狗都可以掛個慈善招牌出嚟，名為募捐，實為掠水。更荒謬嘅係，慈善組織毋須對外披露善款去向，善長仁翁捐出去嘅錢係咪用得其所，有冇畀人中飽私囊，根本冇人知。
唔怪得近年五花八門嘅籌款活動遍地開花，滋擾市民不特止，以慈善之名行騙財之實更加屢見不鮮。呢，○八年四川大地震，本港有騙徒居然大發災難財，冒紅十字會之名，以短訊向市民募捐。至於近年大行其道嘅網上募捐，更加處於失控狀態，任何人都可以喺網上呼籲捐款，各大討論區充斥各種各樣籌款貼子，網民一個唔小心，隨時中招變羊牯。
太一叮都係嗰句，監管漏洞必須堵塞，港人愛心不可欺騙。如果當局繼續做無牙老虎，監管唔湯唔水，市民善心不得好報，騙徒名利雙收，香港呢個「愛心之都」遲早變成「無良都市」嘅咋，叮！
