SUN奇古怪：SUN潮語：【吉 屎】
「吉屎」呢個潮語寫出嚟好似有啲不雅，但如果講出嚟就冇乜問題，因為「吉屎」其實係一句英文，即係GUTS。英語GUTS有幾個解釋，第一個係指腸子；第二係指內臟。另外一個英文諺語意思係「勇氣」、「膽量」，潮語所謂嘅「吉屎」，就係「勇」嘅意思，問人有無「吉屎」，其實係同問人夠唔夠「薑」差唔多。當然，「吉屎」因為係英語，所以比「薑」係貴氣啲，話晒香港始終係崇洋嘛，以至「吉屎」係喺辦公室應用居多。香港地有「吉屎」嘅人從來都唔多，因為多得英國殖民地時代嘅教育，教香港人從來都要做個順民，守秩序守規則聽大人話唔好搞搞震。
特區政府又有新嘅人事任命，前民主黨成員及南區區議員馮煒光被委任為新聞統籌專員，月薪十四萬左右。其實呢單嘢都傳咗好耐，而且有好多政界人士及傳媒人都表示關注，網上面更加反應一面倒，覺得馮煒光絕對冇資格去坐呢個位。好多網民認為馮煒光上次搞藝發局選舉期間錯漏百出，加上呢個人喺民主黨嘅時期都冇乜搞過傳媒嘅工作，仲有嘅就係佢退出民主黨之後，舊年更現身站台支持過國民教育，唔知係咪為咗向上面交心，咩原則咩面都可以唔要？不過，佢今日終於如願以償撈得政府一官半職。所以話，有時做衰人都要有「吉屎」，要有膽識面對千夫所指，畀人鬧先有得撈。
有「吉屎」挑戰權威嘅人，從來都冇乜好下場，細時被罰企，大時被炒魷，有啲如果挑戰當權者嘅話，仲會被人拉！所以回歸咁多年嚟，管治差強人意，賣港賊橫行，香港經濟同競爭力每況愈下，政府愈來愈屈機，香港人都冇「吉屎」反抗。
關乎一七年特首選舉嘅政改諮詢正式開始，但係睇中央官員嘅口風同其他有權力人士嘅言論，呢單嘢真係唔敢睇好。到底香港人有冇「吉屎」去爭取一個真正民主普選？我真係冇「吉屎」去想像。
