設計圖片及對白
政府一公布委任馮煒光做新聞統籌專員，佢當日就迅速辭去南區區議會海怡西議席，隨即惹起各政黨爭相插旗。原本泛民主派協調派出立法會議員「單雞」單仲偕出選，對撼新民黨小花陳家珮，但有傳喺協調機制外嘅人民力量主席Erica袁彌明亦有意加入戰團，仲以狙擊白鴿黨為首要目標，變成泛民鬼打鬼，隨時令建制派冷手執個熱煎堆贏得議席。
白鴿黨前中常委馮煒光喺上屆選舉以十二票之差擊敗教育局政治助理、當時仲係新民黨黨員嘅施俊輝。依家佢走去做官，白鴿黨自然想奪回議席，仲派出「老鴿」單雞收復失地。雖然單雞話未決定選唔選，但據聞佢早已做好咗十幾頁嘅海怡半島未來報告，仲入晒信箱派畀當區居民，而前晚中委會亦已經通過由佢代表黨出戰。
不過，原來人民力量林雨陽都有參加上屆區議會海怡西選舉，得票喺四位候選人中排第三，據聞佢有意捲土重來，或派Erica挑戰單雞。Erica接受查詢時承認，人力有意派人出選海怡西，未來幾日就會定出最後人選，亦唔排除由佢出選。佢批評馮煒光當年出選海怡，但依家竟為做官而背棄承諾，失信於民。佢又話白鴿黨唔肯代馮煒光道歉之餘，仲要派人搶番個位，只可以用「不知所謂」四個字嚟形容喎！
第一手消息請下載on.cc東網
