港聞
  • 陳啟宗未扑頭就戴定頂博士帽,好在場中有人提水叫佢除番。

    中文大學尋日舉行頒授學位典禮,當中包括頒授榮譽博士學位予粵劇名伶芳艷芬、恒隆集團主席陳啟宗等。典禮中出現好多蝦碌鏡頭。陳啟宗係首個出場獲頒博士銜,見佢一起身就戴起頂博士帽,可能現場有人提水,佢先至除低頂帽。之後佢行扑頭禮時,校董會主席Vincent鄭海泉扑完頭又唔記得頒發證書畀佢,就用手指打圈示意佢轉身,但今次陳啟宗就醒喇,企定定唔郁,Vincent先醒起要頒發證書。當陳啟宗接過證書及轉身後,可以正式戴起博士帽,但佢一時間又搞唔清楚點戴,「舞」咗頂帽一陣先成功戴上,認真搞笑。

    芳艷芬獲博士銜,徒弟同好友齊捧場。

    中大喺「讚辭」話陳啟宗直率敢言同勇於發聲,仲話佢嘅言論有時「甚為尖銳,得失權貴,但絕非徒託空言,無的放矢」添,唔知係咪講緊佢以前斥罵「貪曾」前特首曾蔭權爵士嘅劣行呢?不過,陳啟宗喺離開時就冇「敢言」評論政事,只向人介紹佢專程嚟捧場嘅徒弟呂博士。

    講起徒弟,就要講吓另一頒授榮譽博士學位嘅「芳艷芬」楊梁燕芳喇,因為佢嘅唯一徒弟余蕙芬亦有捧場,另外信興集團副主席蒙德揚、超群西餅創辦人李曾超群、醫學美容醫生陸宏隆太太蔡錦裳都到場支持。蒙德揚透露,佢細妹蒙祖兒正正係芳艷芬嘅新抱,所以佢哋係親戚咁話。

    芳艷芬獲親友支持外,本身係醫生、又係半個音樂人嘅中大副校長霍泰輝都係芳艷芬嘅粉絲,佢話自細聽粵曲長大,最鍾意芳艷芬齣《火網梵宮十四年》,可惜無緣睇到偶像現場表演喎。

    第一手消息請下載on.cc東網iPhone/iPad/Android Apps