政府日前推出二○一六立法會選舉及二○一七特首政改諮詢文件，封面仲破天荒用七彩繽紛嘅「對話框框」作主體，同過往嚴肅正經嘅諮詢文件截然不同。不過，文件推出只係幾日，就有人發現諮詢文件中第二十一頁註腳，「全國人大常委會副秘書長喬曉陽在2007年12月19日政制發展座談會上……」一句中嘅日期應為12月29日，而唔係12月19日，唔知邊位政府同事咁大懵呢？
當發現出錯後，政制及內地事務局即時補鑊，喺該頁貼上更正啟事，並喺當局網上公布出錯位置，希望唔會為市民帶來太大不便。政制局發言人話，第一批諮詢文件已經全部派完，新一批喺更正錯誤後已經付印，預計未來幾日將會完成。講起校對出錯，立法會秘書處日前發現《2013年公眾衞生及市政條例（公眾遊樂場地）（修訂附表4）（第2號）令》中第190號法律公告內有一項錯誤，將「trail」變成「trial」，但對條文效力毫無影響。
第一手消息請下載on.cc東網
