政壇：霍震寰趙式慶暗勁過招
匯聚武術發燒友嘅中華國術（香港）總會前晚舉行第一屆理事局就職晚宴，數百武癡雲集。身兼香港武術聯會會長嘅Ian霍震寰亦有嚟到賀，總會會長王嘉恩同主席趙式慶親自迎接。近日面對姊弟接連入稟法庭興訟，Ian淡淡定話無壓力，強調同家人關係唔錯，仲有飲茶見面添，家人入稟興訟，只係對某啲遺產內容唔太清楚明白，所以搵外人畀啲指示，佢期待家人和氣收場。
霍震寰（左）同趙式慶（右）相遇，彼此使出暗勁握手近一分鐘。
周國豐（左）同王嘉恩（右）都希望將中國武術宣揚到國外。
跟住精通空手道、泰拳同洪拳嘅趙式慶熱情地同Ian握手，愈握愈大力，Ian內功深厚，使出暗勁「扣」實對方手腕，兩人暗中較勁一分鐘，高下難分。記者笑言，不如嚟一場正式比武？Ian笑笑口話：「唔會啦，佢係高手！」
身兼副會長嘅周國豐同太太亦有到場，周國豐話自細愛好武術，笑言乜都學一餐，佢話：「我細個學北派少林功夫，直至去英國讀書轉學劍擊，依家就學泰拳，仲學埋詠春。不過我個人好貪心，乜都想學少少。」
