新界鄉議局主席兼立法會議員劉皇發星期三先至喺立會大會動議要求政府廢除大浪西灣納入郊野公園嘅修訂，點知泛民主派議員胡志偉要求政府處理海下、白腊及鎖羅盆呢三幅地納入郊野公園範圍嘅動議，就安排咗喺尋日續會辯論。對於呢兩個相近嘅議題，班議員都已喺星期三講晒，所以尋日都冇人吼胡志偉個動議，即係冇人睇佢台戲，No Show咁話喇！

設計圖片及對白

乏人發言 極速否決

立會尋日續會辯論胡志偉今屆會期嘅頭炮動議，要求政府處理海下、白腊及鎖羅盆三個「不包括土地」納入郊野公園範圍，點知就同星期三大會上、由發叔提出嘅有關大浪西灣嘅動議打對台。不過，當日發叔已嚟咗場個人騷，於是尋日睬你都傻，直情冇現身立法會。胡志偉嘅動議除咗其本人同對動議提咗修訂嘅陳家洛、盧偉國同陳志全外，就只有三位泛民議員發言，而且內容仲了無新意。結果唔使兩個鐘，個動議就以十七票贊成、二十二票反對、九票棄權被否決。

胡志偉會後總結「賽果」，話自己原本嘅部署係諗住有發叔嘅大浪西灣動議行頭，大家應該會對「不包括土地」呢個抽象概念清晰啲，咁輪到佢嘅動議時大家就可以多啲討論，點知個動議又排喺尋日晨咁早辯論，陰差陽錯之下先至搞成咁。佢嘅動議明顯係向發叔同一眾鄉紳挑機，點知發叔眼尾都唔望吓，證明完全唔放佢在眼內，睇嚟佢要認真檢討吓啲策略至得喇！

第一手消息請下載on.cc東網iPhone/iPad/Android Apps