美食天堂失色 有星不如無星
最新一期飲食聖經《米芝蓮指南》又出爐喇，今年香港又有幾多間食肆摘星呢？答案係六十二間，比舊年多咗一間，而且有二百幾家食肆獲推介添，表面睇嚟，香港人果然口福不淺，美食天堂嘅招牌名不虛傳o架。
可惜，睇就好睇，未必好食。六十二間摘星食肆之中，大部分都係高級食府，唔係富豪飯堂就係明星餐廳，對平民百姓嚟講，呢類貴價食肆就似天上嘅星星，可望而不可即，可聞而不可食，數量就算多如繁星，都唔係有好大意義咋。唔通畫餅真係可以充飢，捧住本飲食指南就飽肚咩！
當然，走平民路線而獲星級光環嘅食店唔係話冇，可惜唔多囉，點睇都同美食天堂嘅稱號格格不入。正如有人話齋，香港飲食文化嘅最大特色係豐富多元，包羅萬有，既有高級食府，又有平民食肆，各適其適，豐儉由人。民間美食黯然失色，地道飲食隱沒陋巷，又點算係美食天堂吖！
咁講啦，香港飲食文化中西合璧，源遠流長，本身就係一席美不勝收嘅文化盛宴。好似港式蛋撻、絲襪奶茶、菠蘿油配雙腸煎蛋等等，都係地道特色美食，早就遠近馳名，如果港府頭腦靈活啲，施政用心啲，識得包裝推介，本地特色飲食文化早就發揚光大啦。唔使講咁遠，就講鄰近地區，內地、澳門、台灣、新加坡、曼谷、日本等地，美食各有特色，美食街有聲有色，遊客樂而忘返，產業大吃四方。點會好似香港咁，連一條美食街都冇，搞到特色美食買少見少唔在講，發展空間仲愈來愈窄，遲早變晒集體回憶。
嗱嗱嗱，日本和食同韓國泡菜被聯合國列入非物質文化遺產，證明地道美食可以登上大雅之堂，唔知幾時輪到香港嘅街頭臭豆腐呢？
唉，港產官僚食嘢唔做嘢，做嘢打爛嘢，唔趕絕本地飲食文化算幫忙咯。大家有眼睇，前朝曾蔭權政府一味向大財團傾斜，搞到樓價飆升，租金失控，業界百上加斤，企得住已經偷笑。呢，就算有啲食肆獲米芝蓮青睞，業主即刻飛擒大咬瘋狂加租，結果執笠嘅執笠，搬舖嘅搬舖，搵食不知幾咁艱難。難怪有獲得米芝蓮點評嘅食肆老闆話，擔心業主加租多過獲得推介嘅喜悅，認真無奈。
一句講晒，飲食聖經仙人指路，食肆摘星本來係好事，可惜今時今日營商環境惡劣，港府又闊佬懶理，坐視地道美食逐漸湮沒，摘星都唔係幾值得高興o架，叮！
