香港特別行政區政府編製的《二○一七年行政長官及二○一六年立法會產生辦法諮詢文件》第五頁第一點十四段寫：「修改產生辦法是要走『五步曲』」。

我小學時學過的，只有「×『部』曲」，若寫成「×『步』曲」，肯定食大交叉，印黑豬，唔罰留堂見家長，也要練習正寫罰抄一百次，如斯小學《識字表》裏必有的常用字，一份關乎香港命運的重要文件竟寫錯字？噢！他們玩食字，說有五個Steps走下去，所以用「步」作「部」喎！那更無知，因優秀中文早有「步驟」一詞，解「事情進行的程序」也！而「部曲」則是「古代軍隊編制單位」，泛指「軍隊的組織或行列」，想藉軍事嚇鬼乎？

教評局成日喺會考過後，定必列舉考生之怪異錯失，今劑，又唔見佢哋出嚟揼番兩嘴！喂！仲有呀！另一份「諮詢」小單張，又寫住乜乜「實現願景」，咁！「願景」係乜叉嘢嚟o架呢？據小單張英文版，乃係「Vision」，查《牛津高階英漢雙解詞典》，其解釋是「視力」、「視覺」，又是「想像力」、「遠見」，亦可作「夢幻」、「幻覺」和「異象」，又更是「異常漂亮的人或景象」，即全部含有「縹緲玄虛不實在的幻想」。

唉！用中文「願望」一詞咪好囉！既親切易明又到位，還具有「希望的心願」之意，好好的精博文化不用，係要媚外崇洋，講啲不三不四下九流反智翻譯外語，有無當自己係中國人o架？

每一個政府不懂愛惜本土自家文化，咱們仲信呢班廢柴庸才會真心愛我哋？為咱們爭取美好生活嗎？打死我都唔會信，除非佢哋只揸中國護照啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps